يا لحظة ممكن لحظة

هزتنى لحظه شقيه *** فى طلعة الصحبيه
جايالى جرى بسرعه *** وعايزه تحضن فيا
سألت نفسى سؤال *** معقول تكون دى هيا
طب ليه أنا بالذات *** والناس كتير حواليا
الحيره سكنت قلبى *** من نسمة الفجريه
وتعبت من التفكير *** والأرض دارت بيا
وخفت ابقى جبان *** وصابتنى رعشه قويه
وقلت ليه يا زمان *** تربط قوى فى ايديا
وحلمى يموت فى لحظه *** كان نفسى آخد ديه
غريبه أنتى يا دنيا *** زغللتى والله عنيا
وجريت وراكى كتير*** وقلت دى الحريه
ورسمت أنا لطموحى *** أبراج كبيره عتيه
طنشت الخير وصحبه *** وشافوا منى أسيه
ومشيت ورا أشباح *** وبنيت قصور فى الميه
سرقنى نور مسحور*** وشربت سم الحيه
وحياتى وهم كبير *** رسمته أنا بايديا
يا لحظه ممكن لحظه *** الصبر ليا شويه
هارجع وافكر تانى *** علشان حياتى الجايه
عايز تاريخى منور *** والنيه أحسن نيه